– قالت ستي
البخيل متل الكديش
بيحمل ذهب وبياكل حشيش
– قالت ستي
خايف هزك يا غربالي
يوقع منك كل عزيز وغالي
-قالت ستي
اللي بيعاتب الرخيص
بيرخص
-قالت ستي
اللي بقلبي علساني
واللي مش عاجبو ينساني
– قالت ستي
مش كل ورد خلق للشم
ولا كل البشر بتنفدى بالدم
-قالت ستي
لا تضرب وتغمق الجرح
مابعد العداوة إلا الصلح
-قالت ستي
ناموا عندي ليلة
فكرو حالهم من العيلة
– قالت ستي
بنت الأصل
بتخلي كوخها قصر
– قالت ستي
الله يخلينا بعقولنا
لوقت نوصل لقبورنا
-قالت ستي
لما الكلب يشوف اللحمة
مابقا يعبي عينو العجين
– قالت ستي
يلي بيفشخ أكبر من فشختو
بيوقع وبتنفك رقبتو
– قالت ستي
ماصفي حدا صالح
معظم الناس مصالح
– قالت ستي
ناس من لحمك ودمك باعوك
لا تلوم يلي مبارح عرفوك
– قالت ستي
مش كل يلي بيحكي فهيم
ولا كل يلي بيسكت بهيم
– قالت ستي
دروس الحياة مش ببلاش
دافعين تمنها من عمرنا كاش
– قالت ستي
كله ماشي بألف وش
والقلوب مليانه غش
– قالت ستي
اشكي لربك ونام
ولا تشكي لبني آدم وتنهان
– قالت ستي
الدنيا بالضيق بتورجيك
مين ببيعك ومين بيشتريك
– قالت ستي
شيل الريحانة وشمها
وخود البنت على ريحة أمها
– قالت ستي
دير بالك من البرد القارس
ومن الندل اذا صار فارس
ومن الحرامي اذا اشتغل حارس